¶ 🎥 Adistància — Visioconferéncias (Jitsi)
Adistància es lo servici de visioconferéncia d’APRENE, basat sul logicial liure Jitsi Meet. Permet als ensenhaires e a las còlas Calandreta d’organizar de reünions en linha, de formacions a distància e d’escambis pedagogics, sens compte e sens installacion.
Adreça : 👉 https://adistancia.aprene.org
¶ 1️⃣ Quatre règlas d’aur
1. Causissètz un nom de sala improbable. formation-maths-5e-aurenja-2026 conven ; reunion o test convenon pas.
2. Comunicatz pas jamai lo ligam publicament (site, ret social, aficha).
3. Intratz dins la sala abans vòstres convidats : lo primièr arribat ven moderator.
4. Pas de donadas sensiblas : una sala Jitsi remplaça pas Talk per un escambi sus una situacion individuala d’escolan o de familha.
¶ 2️⃣ Rejónher o crear una reünion
¶ Dempuèi lo navigador (recomandat)
- Anatz sus adistancia.aprene.org.
- Picatz lo nom de la sala, puèi « Démarrer la réunion ».
- Autorizatz lo micro e la camèra quand lo navigador o demanda.
- Picatz vòstre nom complet — es çò que los autres veiràn.
¶ Dempuèi lo mobil
- Aplicacion Jitsi Meet (Android & iOS) : picatz lo nom de la sala, o dobrissètz dirèctament lo ligam recebut.
📌 Cap de compte es pas necessari, ni per vos ni per vòstres convidats.
¶ 3️⃣ Lo primièr arribat es moderator
Sus Jitsi, la primièra persona qu’intra dins una sala ne ven moderator. Pòt :
- verrolhar la sala (degun mai i intra sens autorizacion) ;
- expulsar un participant ;
- copar lo micro de qualqu’un ;
- aviar un enregistrament, se un enregistrador es disponible dins la sala.
⚠️ Consequéncia practica : mandatz pas lo ligam abans d’èsser vos meteis dins la sala. Si que non, un convidat — o un curiós — ven moderator a vòstra plaça.
¶ 4️⃣ Foncionnalitats utilas
- 🎤 Àudio / 🎥 Vidèo en temps real ;
- 🖥️ Partatge d’ecran (Chrome, Firefox, Edge — Safari es desconselhat) ;
- 💬 Chat dins la reünion ;
- ✋ Levar la man per demandar la paraula ;
- 👥 Salas de sosgrops (breakout rooms) per repartir los participants en pichons grops e los far trabalhar separadament ;
- 📱 Fons borrolat, rèireplan virtual.
💡 Las salas de sosgrops son plan practicas per una formacion : repartissètz los participants, los grops trabalhan, puèi los tornatz sonar totes dins la sala principala.
¶ 5️⃣ Las doas limitas de nòstra installacion
Nòstre servidor Jitsi es configurat volontàriament d’un biais simple. Doas consequéncias concrètas :
a) Adistància a pas de servidor relai (TURN).
Sus d’unes rets — Wi-Fi d’establiment escolar, ret d’entrepresa, otèl, de còps la 4G professionala — las connexions dirèctas entre participants son blocadas. Resultat : intratz dins la sala mas degun vos vei ni vos ausís pas, o la reünion demòra blocada sus « connexion… ».
🔁 Dins aqueste cas, utilizatz Nextcloud Talk : Talk dispausa d’un relai a APRENE e passa aquí ont Jitsi fracassa.
b) Lo servici demòra en mòde « pichonas reünions ».
Adistància s’adreiça a de reünions cortas e de talha moderada. Per una reünion longa (mai d’una ora) o amb fòrça participants e las camèras alucadas, Talk es netament mai adaptat.
📌 En resumit : Talk per las reünions importantas e los rets estrictes ; Adistància per un escambi rapid e sens compte.
¶ 6️⃣ Çò qu’Adistància a pas
| Foncion | Adistància | Nextcloud Talk |
|---|---|---|
| Enregistrament de la reünion | ❌ non | ✅ òc (vejatz Talk) |
| Relai (TURN) per rets estrictes | ❌ non | ✅ òc |
| Invitacion de personas sens compte | ✅ òc | ⚠️ per un ligam, mai encadrat |
| Messatjariá persistenta, istoric | ❌ non | ✅ òc |
| Retrobar la reünion automaticament | ❌ non | ✅ òc |
👉 Per un conselh de classa, una reünion de parents, una AG, preferissètz Talk : gardatz una traça, un salon e un enregistrament possible.
¶ 7️⃣ Despanatge
| Simptòma | Causa probabla | Qué far |
|---|---|---|
| La sala se dobrís pas del tot | Ligam incomplet, o interrupcion del servici | Verificatz qu’avètz clicat sul ligam entièr ; tornatz ensajar ; si que non Aquò marcha pas |
| Intri mas degun me vei pas | Ret que blòca la connexion dirècta | Passatz a Talk (seccion 5) |
| Lo son gresilha / ma votz es robotica | Casc Bluetooth | Passatz al cable o a un casc USB |
| M’ausisson pas | Una autra aplicacion ocupa lo micro (Teams, Zoom…) | Barratz-la completament |
| Imatge sacadat | Wi-Fi feble o partejat | Cable de ret, o redusissètz lo nombre de camèras alucadas |
| Tròbi pas la sala ont èri | Jitsi conserva pas los salons | Tornatz-i pel ligam recebut : es pas un istoric |
🔍 Diagnostic complet e metòde pas a pas : 🎧 Micro, camèra, ret : d’ont ven lo problèma ?
¶ 8️⃣ Confidencialitat : pas de nom de sala que se pòsca devinar
Sens senhal, tota persona que coneis lo nom de la sala i pòt intrar. Un nom corrent es doncas un risc vertadièr : un participant indesirable pòt escotar una reünion de trabalh.
- Utilizatz un nom long e impossible de devinar :
conselh-aurenja-2026-03-12-x7k2. - Tornatz pas utilizar lo meteis nom de sala d’un còp a l’autre.
- Per un escambi confidencial (situacion d’escolan, dorsièr familial, question de persona), utilizatz Talk, ligat a vòstre compte, puslèu qu’una sala dobèrta.
¶ 📞 Assisténcia
- 📧 Corrièl : contact@aprene.org
- 💬 Talk (se sètz ja connectat a Estelum) : Joan-Baptista HARDUIN
Darrièra revision : setembre 2026